I mutons dla "Maison Amani"

la diretëura Mdm. Christine
la diretëura Mdm. Christine

"Amani" ie Swahili - l lingaz rujenà a Goma - y uel di "pesc". La cësa Amani ie a Goma, la capitela dla provinzia Nord Kivu tla Republica Democratica dl Congo, sun l cunfin cun l Rwanda. Tla zità de Goma ie la Maison Amani danter l marcià Virunga y la perjon zentrela.

 

La Maison Amani, metuda su tl 1992, ie na istituzion soziela recunesciuda sota la direzion de persones catoliches y evangeliches. La diretëura ie Madame Christine Tabu. Tla cësa vëniel tëuc su mutons danter 3 y 17 ani per i stravardé dai periculi y viulënzes dla stredes. Via per l di vëniel cialà di mutons i anjenian nce ca per jì tla scoles publiches.

Dl 2014 à pona la istituzion giapà l'autorisazion per anjenië ite na tlas dla scola elementera.

Tla Maison Amani giapa i mëndri uni di n cëif ciaut y un n iede al'ena ti vëniel fat n bani. Ai mutons coche nce a si genitores ti vëniel dat cunsëies y aiut n cont dla cura dl corp y educazion sanitera.

Umans singules, che lëura per la majera pert tl marcià iló daujion, giapa microcredic per pudëi mëter mpé n pitl marcià.

 

Davia che la scoles tl Congo giapa pitli o tan che degun contribuc dal stato, iel debujen de damandé ai mutons na chëuta scolastica. Avester che i genitores di mëndri dla Maison Amani ne ie purtruep nia for boni de abiné adum chisc scioldi pervia dla gran stënta, à la istituzion de bujën de aiuc acioche la posse jì inant cun si atività.

 

 

Plu de 250 mutons al'ann vën nseniei ju o anjeniei ca per la scola.


educazion sanitera

I mëndri vën sensibilisei ala cura dl corp, ala mpurtanza dl se lavé ju, dantaldut dan maië, ala defrënza danter ega nëta y ega daldam. N generel dut chël che toca lepro pra na educazion sanitera de basa.

scola

I mutons possa ji a scola tla Maison Amani o tla scola "Liegman" (for sota la direzion de Madame Christine) per mparé a liejer y scrì.

Dantaldut chëi mutons che ne à nia pudù ji a scola per gaujes de viera o autra desdites giapa tlo na segonda ucajion.

assistënza sanitera

La Maison Amani ie n post ulache i mëndri giapa assistënza sanitera de basa, vën cuntrulei unitant da nfermieres giapan nce vitamines che mancia dassën, n prim aiut tl cajo de n debujën.

un n cëif al di

Un n cëif ciaut, che ie per la majera pert di mutons l sëul al di: n taier de fufu - coche na pulënta fata de farina de manioch - y fersëiles. Dala majera festes coche Nadel y Pasca giapa i mutons riji mpede fufu y povester datrai vel versura coche carotes leprò.