Goma, na gran zità sfertuneda

Goma ie la capitela dla provinzia dl Nord-Kivu tla Republica Democratica dl Congo. La ie metuda danter l gran lech Kivu (2.650 km²), ulache passa nce l cunfin danter l Congo y l Ruanda, y l vulcan Nyiragongo (3470 m aut), un di ot vulcans Virunga.

 

Te chësta gran zità vivl plu de na milion de persones. Ti ultims ani ie la populazion jita suviers mo plu debota, davia che l ie unic adalerc truep muciadives dal Ruanda.

 

Dal 1994 iel states tla region Nord Kivu tl Congo dl est doi burta vieres. Nchin a śën ne iel mo nia pesc tl raion, tresora vëniel dant atacs da grupes de rebei y milizies.

 

Coche sce l ne n bastëssa ie dl 2002 rot ora l vulcan Nyiragongo y la lava à curì na gran pert dla zità, brujan y destrujan truepa cëses y avëi. De chësc patësc sambën dantaldut i mëndri.

Geografia

La republica democratica dl Congo ie l segondo plu gran stato dl Africa. Tlo ne pudons nia mé abiné una dla majera forestes pluvieles dl mond, ma nce l grandiscimo ruf cun l medemo inuem Congo, che passa tres l stato y pieta la sëula via de transport tres la foresta.

A est cunfinea l Congo cun l Uganda, l Ruanda y l Burundi. Chisc stati a n gran nflus sun la provinzeis plu a est dl Congo, davia che i ie plu saurìi da arjonjer che l autra pertes dl Congo.

Storia

La republica democratica dl Congo ie n stato a mesa l Africa, rich de materies primes. Da canche ie pieda via la colonisazion an for inò purvà a sfruté chesta risorses mineraries sibes da pert de persones o urganisazions fulestieres geograficamenter plu ujines ma nce da posć plu dalonc. Dantaldut l est dl Congo cun la provinzies Nord-Kivu y Sud-Kivu cun la capitela Goma ie diretamenter tuchedes da chësc conflit.

Cie che vën mo leprò ie che la viera zivila y l genocidio tl stato cunfinant Ruanda, coche nce i guviernesc nia stabii y curoc, à abù n grandiscimo nflus sun l svilup dl Congo.